ភ្នំពេញ៖ ខណៈពេលដែលពលរដ្ឋមួយចំនួនកំពុងជួបទុក្ខលំបាក ភ្នាក់ងារ វីង នៅបណ្តាខេត្តនានានិងនៅក្រុងភ្នំពេញបានស្ម័គ្រចិត្តធ្វើយុទ្ធនាការចែកអង្ករ,ទឹកអាល់កុលលាងដៃ ប្រេងកូឡា,និងថវិកាផ្ទាល់ខ្លួនមួយចំនួនចែកជូនដល់ពលរដ្ឋដែលកំពុងខ្វះខាតដើម្បីទប់ស្កាត់ការរីករាតត្បាតនៃវីរុសកូវីដ១៩ ។
អ្នកស្រីអេងប៊ុនថាជាម្ចាស់ភ្នាក់ងារវីងប្ល៊ូអាយស្ថិតនៅផ្លូវ៤៣០ជិតសណ្ឋាគាររ៉េស៊ីដង់ក្រុងភ្នំពេញបានឱ្យដឹងថាដោយមើលឃើញអត្រានៃការឆ្លងវីរុសកូវីដ១៩ចេះតែបន្តជារៀងរាល់ថ្ងៃអ្នកស្រីបានបរិច្ចាគអង្គរចំនួន៣០០គីឡូក្រាម។អាល់កុលលាងដៃនិងប្រេងកូឡាចែកជូនដល់បងប្អូនកំពុងតែខ្វះខាត។
អ្នកស្រីបានឱ្យដឹងទៀតថា៖«បងប្អូនអ្នកប្រកបរបររើសអេតចាយនិងអ្នករត់ម៉ូតូឌុបមួយចំនួនមិនអាចទិញម៉ាស់អាល់កុលដើម្បីការពារខ្លួនពីការឆ្លងវីរុសកូវីដ១៩បានឡើយ។ក្នុងអំឡុងពេលដ៏ពិបាកនេះពួកគាត់មិនអាចរកប្រាក់កម្រៃបានសមរម្យដើម្បីទ្រទ្រង់ជីវភាពរបស់ពួកគាត់ទេ។ហេតុដូចច្នេះហើយគ្រួសាររបស់ខ្ញុំបានឧបត្ថម្ភអង្ករ៣០០គីឡូក្រាមដើម្បីចែកជូនដល់ពួកគាត់»។
ដោយមើលឃើញសន្តានចិត្តដ៏ប្រពៃរបស់អ្នកស្រីអ្នកជិតខាងរបស់អ្នកស្រីក៏បានចូលរួមឧបត្ថម្ភប្រេងកូឡាទឹកអាល់កុលលាងដៃដើម្បីចែកជូនដល់បងប្អូនដែលកំពុងខ្វះខាតផងដែរ។គិតត្រឹមថ្ងៃទី២៨ខែមីនានេះមានបងប្អូនជាង១០០នាក់ហើយដែលបានទទួលអំណោយដ៏សប្បុរសធម៌ពីក្រុមគ្រួសារនិងអ្នកជិតខាងរបស់អ្នកស្រី។
ចំណែកលោកស្រី គង់ មុនីភក្តី ដែលជាម្ចាស់វីង ឈ្មោះ រតនៈ រង្សី នៅផ្សារឈូកមាស រាជធានីភ្នំពេញ បានរៀបចំចែកជូនជែលលាងដៃដល់អ្នកធ្វើដំណើរនិងអតិថិជនគាត់ជាប្រចាំ។លោកស្រីបានឱ្យដឹងថា៖«ខ្ញុំចែកជែលពួកគាត់នៅតាមហាងវីងរបស់ខ្ញុំទាំង៤សាខាតែម្តង។មួយថ្ងៃនៅតាមហាងនីមួយៗខ្ញុំចែកជូនអស់ប្រហែល១០០ដប។
ក្រៅពីនេះខ្ញុំបរិច្ចាគថវិកាទៅសមាគមផ្សេងៗដើម្បីជួយអ្នកទីទាល់ក្រផងដែរ»។ដោយឡែកនៅសង្កាត់ទួលស្វាយព្រៃខណ្ឌចំការមនរាជធានីភ្នំពេញវិញភ្នាក់ងារវីងដែលមានស្លាកយីហោងួនសីថាបានចែករំលែកទឹកអាល់កុលលាងដៃនិងម៉ាស់ជាច្រើនដោយឥតគិតថ្លៃដល់អតិថិជននិងអ្នកធ្វើដំណើរផងដែរ។
មិនថាឡើយភ្នាក់ងារវីងនៅរាជធានីភ្នំពេញសូម្បីតែបងប្អូនភ្នាក់ងារវីងនៅបណ្តាខេត្តនានាក៏ចូលរួមទប់ស្កាត់កូវីដ១៩ផងដែរ។តួយ៉ាងក្រុមគ្រួសាររបស់លោកឃិនលីហាក់ម្ចាស់ភ្នាក់ងារវីងនិងក្រុមគ្រួសាររបស់លោកក៏បានរួមចំណែកទឹកប្រាក់ចំនួនបួនលានរៀលសម្រាប់ជួយបងប្អូន ដែលកំពុងតែខ្វះខាត ស្ថិតក្នុងភូមិស្រល់ឃុំត្រែងត្រយឹងស្រុកភ្នំស្រួចខេត្តកំពង់ស្ពឺតាមរយៈលោកមេភូមិដោយមួយគ្រួសារៗអាចស្នើរថវិកា ១០ម៉ឺនរៀល។
លោកបានមានប្រសាសន៏ថា៖«នៅពេលដែលសង្គមរបស់យើងកំពុងទទួលរងការវាយប្រហារពីមេរោគកូវីដ១៩នេះយើងមិនអាចឈរអោបដៃមើលបានឡើយ។នៅពេលដែលយើងមានស៊ីគ្រប់គ្រាន់ហើយយើងត្រូវតែចេះចែករំលែកជាពិសេសក្នុងគ្រាដ៏លំបាកនេះ»។ក្រៅពីនេះក៏នៅមានភ្នាក់ងារវីងនៅតាមកន្លែងផ្សេងដទៃទៀតនៅក្នុងប្រទេសកម្ពុជាដែលបានស្ម័គ្រចិត្តបរិច្ចាគថវិកាផ្ទាល់ខ្លួនដើម្បីរួមចំណែកឧបត្ថម្ភដល់ប្រជាជនកម្ពុជាដែលខ្វះខាតបផងដែរ។
យោងតាមសេចក្តីប្រកាសរបស់ក្រសួងសុខាភិបាលចុះផ្សាយនៅព្រឹកថ្ងៃទី២៩ខែមីនាឆ្នាំ២០២០នេះបានឱ្យដឹងថាកម្ពុជាបានរកឃើញមានវិជ្ជមានកូវីដ១៩ចំនួន១ករណីបន្ថែមទៀតដែលធ្វើឲ្យចំនួនអ្នកឆ្លងសរុបនៅទូទាំងប្រទេសកម្ពុជាកើនដល់ទៅ១០៣ករណី៕សុផល
