ភ្នំពេញ៖លោកឧត្តមសេនីយ៍ឯកហ៊ុនម៉ាណែតមេបញ្ជាការកងទ័ពជើងគោកនិងជាអគ្គមេបញ្ជាការរងនៃកងយោធពលខេមរភួមិន្ទបានប្រាប់ក្រុមប្រឆាំងគួររួមគ្នាប្រឆាំងនឹងជំងឺកូវីដ១៩ជាជាងប្រើព័ត៌មានមិនពិតប្រឆាំងនឹងរូបលោក។
នាប៉ុន្មានថ្ងៃមកនេះក្រុមប្រឆាំងក្រៅប្រទេសត្រូវគេឃើញបាននាំគ្នាផ្សព្វផ្សាយព័ត៌មានមិនពិតថាលោកឧត្តមសេនីយ៍ឯកហ៊ុនម៉ាណែតត្រូវបានវៀតណាមចាប់ខ្លួនក្នុងការផ្ទុះអាវុធមួយកាលពីខែមីនាដែលកម្ពុជាមិនដែលមានកើតហេតុការណ៍នោះឡើយ។ព័ត៌មានមិនពិតនេះត្រូវបានក្រុមប្រឆាំងនៅក្រុងហ្វីឡាដែលហ្វីយ៉ានៃរដ្ឋផិនស៊ីលវេនីញ៉ាក្នុងសហរដ្ឋអាមេរិកបានផ្សព្វផ្សាយជាវីដេអូប្រឌិតដើម្បីបំពុលសាធារណមតិ។
លោកឧត្តមសេនីយ៍ឯកហ៊ុនម៉ាណែតនៅថ្ងៃទី១៤ខែមេសាបានប្រាប់បណ្តាញសារព័ត៌មានក្នុងស្រុកដែលបានសាកសួររូបលោកអំពីព័ត៌មានផ្សព្វផ្សាយអំពីក្រុមប្រឆាំងនៅក្រៅប្រទេសនោះ ដោយបញ្ជាក់ថា លោកបានឃើញព័ត៌មាននោះបង្ហោះប៉ុន្មានថ្ងៃមកហើយ។
ប៉ុន្តែលោកមិនចាប់អារម្មណ៍ក្នុងការឆ្លើយតបទៅវិញទេព្រោះវាមិនមែនជាកិច្ចការសំខាន់។អ្វីដែលជាកិច្ចការសំខាន់ចំពោះមុខហើយដែលលោកបានជាប់រវល់បំពេញកិច្ចការនាពេលនេះគឺការចូលជាមួយស្ថាប័ន។អាជ្ញាធរពាក់ព័ន្ធក៏ដូចជាប្រជាពលរដ្ឋខ្មែររាប់លាននាក់ដើម្បីរួមដៃគ្នាជួយបង្កានិងទប់ស្កាត់ការរីករាលដាលនៃជំងឺកូវីដ១៩”។
លោកបានបន្តថាលោកសូមផ្តល់យោបល់ទៅអ្នកដែលតែងតែប្រឌិតរឿងមិនចេះចប់គួរយល់ពីកាលៈទេសៈខ្លះផង។លោកបញ្ជាក់ពេលនេះជាពេលដែលប្រទេសជាតិនិងប្រជាជនខ្មែរទាំងមូលត្រូវរួមសាមគ្គីគ្នាដើម្បីបង្កានិងទប់ស្កាត់ជាមួយជំងឺដ៏កាចសាហាវដែលបានប៉ះពាល់ដល់ប្រជាជនខ្មែរទាំងក្នុងនិងក្រៅប្រទេស។ក៏ដូចជាប្រជាពលរដ្ឋនៅលើសកលលោកមិនមែនជាពេលដែលត្រូវរកវិធីញុះញង់បំបែកបំបាក់គ្នានោះទេ៕សុភាព
