ភ្នំពេញ៖កម្លាំងនគបាលព្រហ្មទណ្ឌក្រសួងមហាផ្ទៃនៅព្រឹកថ្ងៃទី៦ខែឧសភាឆ្នាំ២០២០នេះបានបញ្ជូនខ្លូនជនសង្ស័យម្នាក់ឈ្មោះសេងសុភ័ក្រត្រាអាយុ៤៧ឆ្នាំទៅតុលាការរាជធានីភ្នំពេញដើម្បីចាត់ការតាមច្បាប់ ពាក់ព័ន្ធករណីធ្វើសកម្មភាពគំរាមបាញ់សម្លាប់,គំរាមហែកកេរ្ដិ៍,ប្រើប្រាស់អាវុធខុសច្បាប់និងឆបោក។
មន្ត្រីសមត្ថកិច្ចបានឱ្យដឹងថាការចាប់ខ្លួនបុរសនេះក្រោយបន្លំជានគរបាលពាក់ផ្កាយពីរនៅក្រសួងមហាផ្ទៃហើយធ្វើសកម្មភាពគំរាមសម្លាប់,គំរាមហែកកេរ្ដិ៍,ប្រើប្រាស់អាវុធខុសច្បាប់និងឆបោក។ការឃាត់ខ្លួនបានធ្វើឡើងកាលពីថ្ងៃទី៤ខែឧសភាឆ្នាំ២០២០នៅសង្កាត់ជ្រោយចង្វារខណ្ឌជ្រោយចង្វាររាជធានីភ្នំពេញ។
នៅចំពោះមុខសមត្ថកិច្ច ជនសង្ស័យ បានសារភាពថា ខ្លួនពិតជាបានក្លែងបន្លំជាមន្ដ្រីនគរបាលជាតិ ឋានន្ដរស័ក្ដិផ្កាយពីរ នៅក្រសួងមហាផ្ទៃ ប្រាកដមែន។ក្នុងនោះបានយកប្រាក់ពីជនរងគ្រោះ ចំនួន ១០.៥០០ដុល្លារ ដើម្បីរត់ការចូលក្របខណ្ឌនគរបាលជាតិ តែរត់ការមិនបាន ហើយក៏ចាយអស់ទៅ។
ពេលជនរងគ្រោះទូរស័ព្ទទារលុយ ខ្លួនបានផ្ញើសារគំរាមបាញ់សម្លាប់ បើសិននៅតែទារលុយទៀត។ លុះដល់ថ្ងៃទី៤ ខែឧសភា ឆ្នាំ២០២០ ក៏ត្រូវសមត្ថកិច្ចឃាត់ខ្លួនតែម្ដង រួមជាមួយ អាវុធខ្លីមួយដើម ម៉ាក Glock 26 គ្មានលិខិតប្រើប្រាស់ ៕