ភ្នំពេញ៖កម្លាំងនរបាលបានត្រួតពិនិត្យចរាចរណ៍ផ្លូវគោកក្នុងរយៈពេល៦ថ្ងៃនិងផាកពិន័យលើយានយន្តបានចំនួន១២.៤៤១គ្រឿង។ក្នុងនោះម៉ូតូ៩.៣៥៧គ្រឿងនិងរថយន្ត៣,០៨៤គ្រឿង។ក្រោមការរឹតបន្ដឹងច្បាប់ចរាចរណ៍ផ្លូវគោកដោយបង្កើនប្រាក់ពិន័យតាមអនុក្រឹត្យលេខ៣៩នៅទូទាំងប្រទេសកម្ពុជាគឺថ្ងៃទី១-៦ខែឧសភា ឆ្នាំ២០២០នេះ។
អ្នកនាំពាក្យនៃអគ្គស្នងការដ្ឋាននគរបាលជាតិបានថ្លែងថារយៈពេល៦ថ្ងៃនេះគេសង្កេតឃើញគ្រោះថ្នាក់ចរាចរណ៍កើតឡើងសរុប៣៦លើកស្លាប់១៩នាក់ និងរបួស៥០នាក់។ សម្រាប់ថ្ងៃទី៦ ខែឧសភានេះ យានយន្តដែលល្មើសត្រូវបានត្រួតពិនិត្យនិងផាកពិន័យមាន១.៨៤៣គ្រឿង។ក្នុងនោះម៉ូតូមាន១.៣៦១គ្រឿង និងរថយន្ត៤៨៣គ្រឿង។
លោកបន្តថាសម្រាប់ម៉ូតូបទល្មើសត្រូវបានកត់សម្គាល់ភាគច្រើនគឺអត់ពាក់មួកបំពានស្លាកសញ្ញានិងអត់ស្លាកលេខ។សម្រាប់រថយន្តវិញពាក់ព័ន្ធនឹងការល្មើសល្បឿនអត់ពាក់ខ្សែក្រវាត់គ្មានបណ្ណបើកបរនិងបើកបរប្រើប្រាស់ទូរស័ព្ទ។
ក្នុងនាមអ្នកនាំពាក្យអគ្គស្នងការដ្ឋាននគរបាលជាតិលោកឆាយគឹមខឿនបានវាយតម្លៃថារយៈពេល៦ថ្ងៃនេះការអនុវត្តតាមអនុក្រឹត្យថ្មីក្នុងការផាកពិន័យយានយន្តល្មើសបានដំណើរការទៅយ៉ាងល្អប្រសើរ៕