កំពត៖អភិបាលខេត្តកំពតបានជំរុញដល់អាជ្ញាធរនិងបណ្តាផ្នែកពាក់ព័ន្ធត្រូវគាំទ្ររាល់កិច្ចអភិវឌ្ឍដើម្បីបម្រើប្រយោជន៍សាធារណៈ ពិសេសគម្រោងនៃការសាងសង់ផ្លូវធ្វើដំណើរ។ កាលពីថ្ងៃទី៤ខែមិថុនាឆ្នាំ២០២០នៅសាលប្រជុំសាលាខេត្តកំពតមានបើកកិច្ចប្រជុំដើម្បីពិនិត្យពិភាក្សាគម្រោងសាងសង់ផ្លូវបេតុងមួយខ្សែស្របតាមបណ្ដោយឆ្នេរសមុទ្រស្ថិតក្នុងឃុំព្រែកត្នោត ស្រុកទឹកឈូ។
ក្នុងកិច្ចប្រជុំនោះលោកជាវតាយបានមានប្រសាសន៍ថារាល់ការអភិវឌ្ឍន៍រមែងមានផលប៉ះពាល់តិចឬច្រើនដោយមិនអាចគេចផុតឡើយបើមិនប៉ះពាល់ផលប្រយោជន៍រដ្ឋក៏ប៉ះពាល់ផ្នែកឯកជនឬប្រជាពលរដ្ឋជាក់ជាមិនខាន។
ម្ល៉ោះហើយទើបគម្រោងស្ថាបនាផ្លូវបេតុងបណ្តោយជាង៣.៥០០ម៉ែត្រទទឹង១២ម៉ែត្រប្របឆ្នេរសមុទ្រស្ថិតក្នុងឃុំព្រែកត្នោតស្រុកទឹកឈូនេះតម្រូវឱ្យមានកិច្ចសហការពីគ្រប់ភាគីពាក់ព័ន្ធដើម្បីចូលរួមរកដំណោះស្រាយ។
ជាគំនិតរបស់លោកទាំងអាជ្ញាធរក៏ដូចជាមន្ត្រីជំនាញគួរគាំទ្រគម្រោងនេះព្រោះបន្ទាប់ពីស្ថាបនារួចរាល់ផ្លូវមួយខ្សែនោះនឹងបម្រើផលប្រយោជន៍រួមទាំងអស់គ្នា។លោកអភិបាលខេត្តបានបន្តថាក្នុងករណីដែលមានការយល់ព្រមមន្ត្រីជំនាញនិងអាជ្ញាធរក៏ត្រូវមានគំរូប្លង់មេប្រកាសផ្សព្វផ្សាយដល់ប្រជាពលរដ្ឋព្រមទាំងមជ្ឍដ្ឋាននានាឱ្យបានទូលំទូលាយជៀសវាងបាតុភាពអវិជ្ជមានណាមួយកើតឡើងពេល ឬក្រោយការសាងសង់រួចរាល់។
សូមបញ្ជាក់ថាកន្លងមកគម្រោងផ្លូវបេតុងមួយខ្សែនេះចាប់ផ្តើមស្ថាបនាបានជាងមួយពាន់ម៉ែត្រទៅហើយតែប្រជាពលរដ្ឋមូលដ្ឋានជំទាស់ព្រោះមានការយល់ច្រឡំទើបផ្អាកដំណើរការវិញ។ដូច្នេះក្នុងកិច្ចប្រជុំនេះ លោកអភិបាលខេត្តកំពតបានចង្អុលបង្ហាញនូវចំណុចសំខាន់ៗមួយចំនួន រួមមាន ១, អាជ្ញាធរនិងមន្ត្រីពាក់ព័ន្ធត្រូវចុះសិក្សាកំណត់ទីតាំងឱ្យបានច្បាស់លាស់ជាមុន។
២,មន្ត្រីសុរិយោដីត្រូវធ្វើគំរូប្លង់មេដើម្បីផ្សព្វផ្សាយដល់ប្រជាពលរដ្ឋទូទៅ។៣,រដ្ឋបាលស្រុកទឹកឈូនិងអាជ្ញាធរឃុំព្រែកត្នោតត្រូវចុះសម្របសម្រួលព្រមទាំងស្រង់ព័ត៌មានលម្អិតទាក់ទង់នឹងគម្រោងសាងសង់ផ្លូវមួយខ្សែនេះ៕ឌីណា
