ភ្នំពេញ៖អង្គការរ៉ាក់បានរៀបចំសិក្ខាសាលាតម្រង់ទិសស្ដីពីសុខភាពស្ត្រីដល់បណ្ដាញអ្នកសារព័ត៌មានអំពីសុខភាពផ្លូវភេទសុខភាពបន្តពូជនិងការរំលូតកូនដើម្បីរួមចំណែកផ្សព្វផ្សាយព័ត៌មានត្រឹមត្រូវ និងកាត់បន្ថយការមាក់ងាយជុំវិញការរំលូត។
ការរៀបចំសិក្ខាសាលាស្ដីពី«បណ្ដាញសារព័ត៌មាននិងការកសាងសមត្ថភាពដើម្បីកាត់បន្ថយការមាក់ងាយជុំវិញការរំលូត»និងវគ្គបណ្ដុះបណ្ដាលស្ដីពី«ការឆ្លុះបញ្ចាំងពីទស្សនៈជុំវិញការរំលូតនៅប្រទេសកម្ពុជានិងសុខភាពផ្លូវភេទសុខភាពបន្តពូជនិងសិទ្ធិ»បានប្រព្រឹត្តទៅចាប់ពីថ្ងៃទី២២ដល់ថ្ងៃទី២៤ខែកក្កដាឆ្នាំ២០២០នាសណ្ឋាគារសាន់វេ
លោកវេជ្ជបណ្ឌិតវ៉ាជីវ័ននាយកប្រតិបត្តិអង្គការរ៉ាក់បានមានប្រសាសន៍ថា៖សិក្ខាសាលានេះមានគោលបំណងលើកកម្ពស់ឥរិយាបថចូលរួមកាត់បន្ថយការមាក់ងាយនិងរើសអើងជាពិសេសអ្នកផ្តល់សេវារំលូតស្ត្រីដែលស្វែងរកនិងទទួលបានសេវារំលូត។
សិក្ខាសាលានេះមានការគាំទ្រដោយមូលនិធិសកម្មភាពរំលូតដោយសុវត្ថិភាព(SAAF)ដើម្បីអនុវត្តគម្រោង«បណ្តាញសារព័ត៌មាននិងការកសាងសមត្ថភាពដើម្បីកាត់បន្ថយការមាក់ងាយជុំវិញការរំលូត » ដែលគម្រោងនេះ នឹងអនុវត្តរយៈពេល១៨ខែ ។
សូមបញ្ជាក់ថាអង្គការរ៉ាក់រៀបចំសិក្ខាសាលាតម្រង់ទិសនេះគឺរយៈពេល២ថ្ងៃកន្លះមានអ្នកចូលរួមចំនួន៦០នាក់មកពីក្រសួងព័ត៌ចំនួន១៤នាក់និងបណ្តាញសារព័ត៌មានឯករាជនិងស្ថានីយ៍ទូរទស្សន៍ឯកជនចំនួន១៦នាក់និងអង្គការមិនមែនរដ្ឋាភិបាលចំនួន៣០នាក់។
លោកស្រីកុចនារតីទីប្រឹក្សាក្រសួងពត៌មាននិងលោកវេជ្ជបណ្ឌិតប៉ិចសុធីអនុប្រធានមជ្ឈមណ្ឌលគាំពារមាតានិងទារកនៃក្រសួងសុខាភិបាល បានអញ្ជើញជាវាគ្មិននៅក្នុងសិក្ខាសាលានេះ។
លោកស្រីកុច នារតី ទីប្រឹក្សាក្រសួងព័ត៌មាននិងជាតំណាងលោកខៀវកាញ៉ារីទ្ធរដ្ឋមន្ត្រីក្រសួងពត៌មាន បានលើកឡើងថា៖សិក្ខាសាលាតម្រង់ទិសនេះមានសារៈសំខាន់ណាស់ដើម្បីកសាងនិងពង្រឹងសមត្ថភាពដល់អ្នកសារពត៌មានក្នុងការចូលរួមចំណែកផ្សព្វផ្សាយឱ្យបានទូលំទូលាយត្រឹមត្រូវនិងច្បាស់លាស់ ទៅដល់ប្រជាពលរដ្ឋអំពីសុខភាពបន្តពូជ ជាពិសេសការរំលូតកូនដោយសុវត្ថិភាព។
លោកវេជ្ជបណ្ឌិតប៉ិចសុធីអនុប្រធានមជ្ឈមណ្ឌលគាំពារមាតានិងទារកបានមានប្រសាសន៍ឱ្យដឹងថារាជរដ្ឋាភិបាលជាពិសេសក្រសួងសុខាភិបាលបាននិងកំពុងធ្វើការកែលម្អស្ថានភាពបន្តពូជនៅកម្ពុជាឱ្យកាន់តែប្រសើរ។លោកវេជ្ជបណ្ឌិតបានបញ្ជាក់ថាការរំលូតគឺស្របច្បាប់នៅក្នុងប្រទេសកម្ពុជា។ច្បាប់នៃការរំលូតបានប្រកាសជាផ្លូវការតាំងពីឆ្នាំ១៩៩៧និងប្រកាសឱ្យអនុវត្តដោយក្រសួងសុខភិបាលនៅឆ្នាំ២០០២។
ការរំឡូតដោយសុវត្ថិភាពអាចអនុវត្តបានលុះណាតែផ្ទៃពោះមានលក្ខណៈមិនប្រក្រតីដែលអាចបង្កគ្រោះថ្នាក់ធ្ងន់ធ្ងរដល់ម្តាយឬទារកករណីមានផ្ទៃពោះដោយសារការរំលោភនិងទារកដែលនឹងកើតមកមានជំងឺធ្ងន់ធ្ងរព្យាបាលពុំជា៕សុផល