ភ្នំពេញៈ មនុស្សជាង ៥០០នាក់បានស្លាប់ និងរបួសជាង ១.៥០០នាក់ នៅក្នុងគ្រោះថ្នាក់ចរាចរណ៍ទូទាំងប្រទេស រយៈពេល ១២៣ថ្ងៃ គិតចាប់ពីថ្ងៃទី១ ខែឧសភា ដល់ថ្ងៃទី៣១ ខែសីហា ឆ្នាំ២០២០។
លោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ បានឱ្យដឹងថា ៖គ្រោះថ្នាក់ចរាចរណ៍រយៈពេល ១២៣ថ្ងៃ គិតចាប់ពីថ្ងៃទី១ ខែឧសភា ដល់ថ្ងៃទី៣១ ខែសីហា ឆ្នាំ២០២០ បានកើតឡើង ៩៩២លើក ។
ស្លាប់មនុស្សចំនួន ៥០៩នាក់ របួសចំនួន ១.៥៥៤នាក់របួសធ្ងន់ ៩១៣នាក់។អ្នកនាំពាក្យបន្តថា សម្រាប់គ្រោះថ្នាក់ចរាចរណ៍នៅថ្ងៃទី៣១ ខែសីហា ឆ្នាំ២០២០ កើតឡើងចំនួន ១៥លើក ស្លាប់ ៨នាក់ និងរបួសចំនួន ២០នាក់ ក្នុងនោះធ្ងន់ចំនួន ១១នាក់។
របាយការណ៍បូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆមាសទី១ឆ្នាំ២០២០ បានឱ្យដឹងថា គ្រោះថ្នាក់ចរាចរណ៍ក្នុងឆមាសទី១ ឆ្នាំ២០២០ បានកើតឡើងចំនួន ១.៦១៩លើក បណ្ដាលឱ្យស្លាប់ចំនួន៨១៦នាក់ និងរបួសចំនួន២.៤៤៩នាក់ (របួសធ្ងន់១.១២៣នាក់) អ្នកស្លាប់ភាគច្រើននៅរាជធានីភ្នំពេញ ១៤៦នាក់ ខេត្តកំពង់ធំ ៦០នាក់ និងខេត្តកណ្ដាល ៥៩នាក់។
របាយការណ៍ដដែលបានបន្តថា មូលហេតុនៃការគ្រោះថ្នាក់ចរាចរណ៍មកពី បើកបរលើសល្បឿនកំណត់៣៣ភាគរយមិនគោរពសិទ្ធិ២៣ភាគរយមិនប្រកាន់ស្គាំ១៤ភាគរយ វ៉ាជែង១០ភាគរយបត់១០ភាគរយ ស្រវឹង៦ភាគរយកត្តាយានយន្ដ៤ភាគរយនិងងងុយ១ភាគរយ។
បើប្រៀបធៀបឆមាសទី១ ឆ្នាំ២០១៩ គ្រោះថ្នាក់ថយចំនួន៥៥២លើក ស្មើ២៥ ភាគរយស្លាប់ថយចំនួន១៧២នាក់ស្មើ១៧ភាគរយ និងរបួសថយ៧៧៨នាក់ ស្មើ២៤ភាគរយ៕សុភាព
