អន្តរជាតិ៖(ហាណូយ)នាយករដ្ឋមន្ត្រីង្វៀនសួនហ្វ៊ុកកាលពីថ្ងៃអង្គារទី១ធ្នូឆ្នាំ២០២០បានបញ្ជាឱ្យផ្អាកជាបណ្តោះអាសន្នជើងហោះហើរអន្តរជាតិចូលមកក្នុងប្រទេសវៀតណាមទាំងអស់ក្រោយ
ផ្ទុះការឆ្លងជំងឺកូវីដ១៩នៅក្នុងសហគមន៍ជាថ្មីនៅក្នុងប្រទេសរបស់លោក។
លោកនាយករដ្ឋមន្ត្រីង្វៀនសួនហ្វ៊ុកបាននិយាយនៅក្នុងកិច្ចប្រជុំគណៈរដ្ឋមន្ត្រីមួយកាលពីថ្ងៃអង្គារថា មានតែជើងហោះហើរដឹកជនជាតិវៀតណាមវិលត្រឡប់ពីបរទេសវិញទេដែលនឹងត្រូវអនុញ្ញាតឱ្យចូល។យន្តហោះនៃក្រុមហ៊ុនអាកាសចរណ៍វៀតណាម នាំអ្នកដំណើរមកពីកូរ៉េខាងត្បូងមកកាន់ក្រុងហាណូយកាលពីខែកញ្ញាឆ្នាំ២០២០។មន្ត្រីវៀតណាមបន្ទោសអ្នកបម្រើការលើយន្តហោះម្នាក់ចំពោះការឆ្លងក្នុងស្រុកជាថ្មី ដោយសារបុរសនេះរំលោភច្បាប់ចត្តាឡីស័ក។
លោកម៉ាយ ទៀនយុង ប្រធានការិយាល័យរដ្ឋបាលបាននិយាយថាៈការផ្អាកនេះគឺដើម្បីទុកឱកាសឱ្យរដ្ឋាភិបាលងាយគ្រប់គ្រងការឆ្លងរាលដាលជំងឺនិងការធ្វើចត្តាឡីស័កអ្នកទើបចូលមកដល់ថ្មី។ទោះជាយ៉ាងណា «រដ្ឋាភិបាលនៅអនុញ្ញាតឱ្យយន្តហោះនាំជនជាតិវៀតណាមវិលមកស្រុកវិញនៅឡើយទេ សម្រាប់មនុស្សចាស់អ្នកជំងឺឬអ្នកជួបបញ្ហាហិរញ្ញវត្ថុ»។
កាលពីថ្ងៃចន្ទ វៀតណាមបានបញ្ចប់ពេលមិនមានការឆ្លងក្នុងស្រុកអស់ពេល៨៨ថ្ងៃ នៅពេលបុរសនៅក្រុងហូជីមិញម្នាក់ជាគ្រូបង្រៀនភាសា ត្រូវបានបញ្ជាក់ថាកើតកូវីដ១៩ ក្រោយឆ្លងមកពីមិត្តម្នាក់ ជាអ្នកបម្រើការលើយន្តហោះ។
នៅថ្ងៃអង្គារនេះដែរ វៀតណាមបានរកឃើញអ្នកឆ្លងកូវីដ១៩ក្នុងស្រុក២នាក់ទៀតពាក់ព័ន្ធនឹងករណីខាងលើ ។ពួកគេជាកូនក្មេងអាយុ១ឆ្នាំម្នាក់និងបុរសអាយុ២៨ឆ្នាំ ដែលត្រូវជាក្មួយនិងសិស្សរបស់អ្នកឆ្លងកាលពីថ្ងៃចន្ទ។អ្នកជំងឺអាយុ១ឆ្នាំនេះជាក្មួយរបស់គ្រូភាសាអង់គ្លេសអាយុ៣២ឆ្នាំ ដែលត្រូវបានប្រកាសថាមានវិជ្ជមានកូវីដ១៩កាលពីថ្ងៃចន្ទ។
ជាមួយនឹងតួលេខឆ្លងថ្មី វៀតណាមឥឡូវមានអ្នកកើតកូវីដ១៩សរុប១.៣៥១នាក់ តែ១.១៩៥នាក់បានជាសះស្បើយនិង៣៥នាក់បានស្លាប់ដោយកូវីដ១៩៕កែសម្រួល៖កែវ.សំណាង
