ភ្នំពេញ៖ភ្លៀងរដូវវស្សានឹងធ្លាក់រាយប៉ាយច្រើនជាថ្មីចាប់ពីក្រោយថ្ងៃទី៦ខែ មិថុនា បន្ទាប់ពីចុះខ្សោយមួយរយៈទោះជាបីយ៉ាងការដាំដុះស្រូវវស្សាដោយវិធីសាបព្រោះ(ស្រូវ)គោកអនុវត្តបានប្រមាណជា២៨,៤១ភាគរយនៃផែនការ២,៥លានហិកតាហើយគិតត្រឹមដំណាច់ខែឧសភាកន្លងទៅនេះ។
លោកចាន់យុត្ថាអ្នកនាំពាក្យនិងជារដ្ឋលេខាធិការក្រសួងធនធានទឹកនិងឧតុនិយមបានឱ្យដឹងនៅថ្ងៃទី៣ខែមិថុនាឆ្នាំ២០២០ថាខ្យល់មូសុងនិរតីបានថយឥទ្ធិពលបន្តិចទៅវិញតែភ្លៀងធ្លាក់ច្រើននៅតែមានសម្រាប់តំបន់ទំនាបកណ្តាលនិងវាលទំនាបភាគពាយព្យលើកលែងតែតំបន់ខ្ពង់រាបភាគខាង ជើងនិងតំបន់ខ្ពង់រាបភាឦសានដែលមានភ្លៀងធ្លាក់ខ្សោយ។
ទោះបីភ្លៀងមិនទាន់បានធ្លាក់មកគ្រប់គ្រាន់គ្រប់កន្លែងក៏ដោយលោកចាន់យុត្ថានិយាយថាការភ្ជួររាស់សាបព្រោះស្រូវវស្សាគិតត្រឹមដំណាច់ខែឧសភាអនុវត្តបាន៧៣២.៦៥៦ហិកតាស្មើ២៨,៤១ភាគរយនៃផែនការ២.៥៧៩.១៨១ហិកតា ហើយ ដែលភាគច្រើនកសិករដាំដុះដោយវិធីព្រោះ(ស្រូវ)គោក។
លោកចាន់យុត្ថានិយាយឱ្យដឹងទៀតថាខ្យល់មូងសុងនិរតីនឹងបង្កើនឥទ្ធិពលមកវិញនៅអំឡុងថ្ងៃទី៦ខែឧសភាបន្ទាប់ពីព្យុះស៊ីក្លូនមួយនៅក្នុងសមុទ្រឥណ្ឌាបានរលាយហើយមានសម្ពាធទាបសកម្មមួយ ទៀតបានកើតឡើង នៅ ក្នុង សមុទ្រដដែលនេះ ដោយមានឥទ្ធិពលដល់ឈូងសមុទ្រអាដាមិន (Andaman) ធ្វើ ឱ្យមានភ្លៀងធ្លាក់រាយប៉ាយច្រើនសារជាថ្មីទៅដល់តំបន់ខ្ពង់រាបខាងជើងនិងតំ បន់ ខ្ពង់ រាបភាគឦសាន។
លោកចាន់យុត្ថាបាននិយាយឱ្យដឹងផងដែរថាដោយកន្លងទៅនេះនៅតំបន់អាងទន្លេមេគង្គលើបានភ្លៀងធ្លាក់ជាបន្តបន្ទាប់បានធ្វើឱ្យទឹកទន្លេមេគង្គចាប់ផ្តើមមានចលនាឡើងចុះតែមិនទាន់មានសញ្ញាណអ្វីគួរឱ្យព្រួយបារម្ភទេ។ស្ថានភាពកម្ពស់ទឹកទន្លេនៅខេត្តស្ទឹងត្រែងថ្ងៃទី៣ខែមិថុនាមាន២.៩៧ម៉ែត្រខ្ពស់ជាងថ្ងៃទី២ខែមិថុនា០.០៤ម៉ែត្រ។
នៅខេត្តក្រចេះទឹកមានកម្ពស់៧.៧៥ម៉ែត្រខ្ពស់ជាងថ្ងៃទី២ខែមិថុនា០.៣២ម៉ែត្រនៅខេត្តកំពង់ចាមទឹកមានកម្ពស់២.៨៤ម៉ែត្រខ្ពស់ជាងថ្ងៃទី២ខែមិថុនា០.០២ម៉ែត្រ នៅទន្លេបាសាក់ចតុមុខទឹកមានកម្ពស់ ១.៦៤ម៉ែត្រទាបជាងថ្ងៃទី២ខែមិថុនា០.១៣ម៉ែត្រនិងនៅបឹងទន្លេសាបកំពង់លួងទឹកមានកម្ពស់០.៤០ម៉ែត្រ។
ក្រសួងធនធានទឹកនិងឧតុនិយមកាលពីថ្ងៃទី២ខែមិថុនាឆ្នាំ២០២០ថាបានជូនដំណឹងអំពីស្ថានភាពអាកាសធាតុសម្រាប់ពីថ្ងៃទី៣ដល់ថ្ងៃទី៩ខែមិថុនាឆ្នាំ២០២០ថាខ្យល់មូសុងនិរតីនៅមានឥទ្ធិពលបង្គួរធ្វើឱ្យចាប់ពីថ្ងៃទី៣ដល់ថ្ងៃទី៩ខែមិថុនានៅបណ្តាខេត្តតំបន់វាលទំនាបកណ្តាលសីតុណ្ហភាពមានពី២៥ទៅ២៧ អង្សាសេ សីតុណ្ហភាពអតិបរមា មានពី៣៤ទៅ៣៦អង្សាសេ។
ខេត្តនៅតំបន់ជួរភ្នំដងរែកនិងខ្ពង់ភាគឦសានសីតុណ្ហភាពមានពី២៤ទៅ២៦អង្សាសេសីតុណ្ហភាពអតិបរមាមានពី៣៣ទៅ៣៥អង្សាសេ។ បណ្តាខេត្តនៅតំបន់មាត់សមុទ្រសីតុណ្ហភាពមានពី២៥ទៅ២៧ អង្សាសេសីតុណ្ហភាពអតិបរមាមានពី៣២ទៅ៣៤អង្សាសេ។នៅក្នុងសេចក្តីជូនដំណឹងបានសរសេរទៀតថាចាប់ពីថ្ងៃទី៣ដល់ថ្ងៃទី៩ខែមិថុនានៅតំបន់វាលទំនាបកណ្តាលអាចនឹងមានភ្លៀងធ្លាក់រាយប៉ាយពីមធ្យមទៅ បង្គួរ ។
ក្នុងនោះមានផ្នែកខ្លះនៃវាលទំនាបភាគពាយព្យនិងភាគកណ្តាលអាចមានភ្លៀងធ្លាក់ច្រើន។តំបន់ជួរភ្នំដងរែកនិងខ្ពង់រាបភាគឦសានអាចមានភ្លៀងពីខ្សោយទៅមធ្យមនិងតំបន់មាត់សមុទ្រអាចមានភ្លៀងពីតិចទៅបង្គួរ។បាតុភូតផ្គររន្ទះនិងខ្យល់កន្ត្រាក់នៅតែបន្តកើតមានត្រូវប្រុងប្រយ័ត្នពិសេសតំបន់វាលទំនាប តំបន់ជួរភ្នំដងរែកនិងខ្ពង់រាបភាឦសាន៕ខុន
