សៀមរាប៖កាលពីព្រឹកថ្ងៃទី២៥ខែមករាឆ្នាំ២០២០ប្រជាជនទាំងប្រុសស្រីចាស់ក្មេងប្រមាណ៥០០នាក់បានមកប្រមូលផ្តុំគ្នានៅបឹងធំមួយដែលស្ថិតនៅក្នុងភូមិបង្កោងឃុំអំពិលស្រុកប្រាសាទបាគងខេត្តសៀមរាប។
បឹងធំមួយនេះអ្នកភូមិអភិរក្សត្រីទុកមិនឱ្យមានការនេសាទផ្តេសផ្តាសនោះឡើយគឺសម្រាប់តែរកត្រីរួមគ្នាដើម្បីយកមកធ្វើជាចង្ហាន់ប្រគេនព្រះសង្ឃក្នុងថ្ងៃឡើងមាឃឬឡើងអ្នកតាដែលប្រារព្ធធ្វើឡើងនៅថ្ងៃ២៧ខែមករាឆ្នាំ២០២០។
ត្រីនោះយកធ្វើម្ហូបសម្រាប់គ្រួសារព្រមទាំងទទួលភ្ញៀវដែលជាទំនៀមរបស់អ្នកស្រុកអង្គរប្រារព្ធធ្វើជារៀងរាល់ឆ្នាំ។នៅម៉ោង៧ព្រឹកគណៈកម្មការភូមិបាញ់កាំជ្រួចបន្លឺស្នូរជាសញ្ញាអនុញ្ញាតឱ្យចុះចាប់ត្រីបានហើយ។
ដោយឡែកការរកត្រីនេះអនុញ្ញាតឱ្យប្រជាជនក្នុងភូមិបង្កោងតែប៉ុណ្ណោះដោយមិនអនុញ្ញាតឱ្យប្រជាជនភូមិក្រៅចុះចាប់នោះឡើយ។ការនេសាទប្រើប្រាស់តែឧបករណ៍បុរាណទាំងអស់រួមមានដូចជាឆ្នៀងអង្រុតនិងសំណាញ់ជាដើម។ចំពោះការចាប់ត្រីនេះគណៈកម្មការបានកំណត់ជាពីរផ្នែក។
ជាដំបូងប្រជាជនទាំងអស់អាចរកត្រីទុកសម្រាប់ខ្លួនឯងផ្ទាល់។រីឯមួយផ្នែកនៃបឹងដែលដាក់សម្រាស់ការពារមិនឱ្យចាប់ពីដំបូងនោះត្រូវចាប់ទុករួមសម្រាប់ធ្វើទឹកនំបញ្ចុកប្រគេនព្រះសង្ឃ។
លោកពេជ្រឃិនមេភូមិបង្កោងនិងជាគណៈកម្មការរៀបចំបានឱ្យដឹងថាដោយនៅឆ្នាំនេះខ្សត់ទឹកភ្លៀងនិងមិនមានទឹកធំផងទើបមិនសំបូរត្រី។គណៈកម្មការគ្រប់គ្រងនិងអភិរក្សបឹងបានប្រលែងកូនត្រីប្រមាណ១.៥០០ក្បាលកាលពីអំឡុងខែ១០ឆ្នាំ២០១៩ដើម្បីរក្សាទិន្នផលត្រីដើម្បីបានផ្គត់ផ្គង់កម្មវិធីនៅឆ្នាំនេះបន្ត។
លោកបន្តថាការចាប់ត្រីឡើងមាឃនេះមានជាយូរយារមកហើយ។រៀងរាល់ខែមាឃបន្ទាប់ពីបញ្ចប់ការច្រូតកាត់និងដាក់ស្រូវក្នុងជង្រុករួចរាល់។លោកបញ្ជាក់ថាថ្វីបើកម្មវិធីនេះមានជាយូរមកហើយតែការរៀបចំបានគគ្រឹគគគ្រេងប្រមាណជាង១០ឆ្នាំកន្លងមកនេះ។
លោកមេភូមិបានបន្តថានៅពេលលោកមានតួនាទីជាមេភូមិក្នុងភូមិបង្កោងលោកតែងតែអប់រំប្រជាជនក្នុងភូមិនិងអ្នកណាក៏ដោយដែលនឹងក្លាយជាអ្នកដឹកនាំបន្តវេណពីលោកធ្វើយ៉ាងណាថែរក្សាទនៀមទម្លាប់នេះឱ្យបានគង់វង្សសម្រាប់កូនចៅជំនាន់ក្រោយនាពេលអនាគត។
លោកស្រីឆៃណាតដៃមមាញឹកចាប់ត្រីដោយដៃម្ខាងកាន់អង្រុតដៃម្ខាងរាវរកត្រីក្នុងអង្រុតបាននិយាយដោយទឹកមុខរីករាយថាខ្ញុំបានមករកត្រីជារៀងរាល់ឆ្នាំ។ថ្ងៃនេះបានក្រោកមកជាមួយអ្នកភូមិតាំងពីម៉ោង៥ទាបភ្លឺមកម្ល៉េះ។
លោកស្រីបន្តថាឆ្នាំនេះមិនសូវសំបូរត្រីដូចឆ្នាំមុនៗនោះទេដោយសារតែឆ្នាំនេះមិនមានទឹកធំ មានតែទឹកភ្លៀងប៉ុណ្ណោះ បណ្តាលឱ្យទិន្និផលត្រីធ្លាក់ចុះ។
តំបន់រមណីយដ្ឋានអង្គរជាតំបន់បេតិកភណ្ឌរស់ដែលសម្បូរទៅដោយមរតកអរូបីយជាច្រើនហើយត្រូវបានអ្នកស្រុកអង្គរបន្តប្រណិបត្តិយ៉ាងខ្ជាប់ខ្ជួនរហូតមកដល់បច្ចុប្បន្ន។ពិធីបុណ្យឡើងមាឃឬបុណ្យឡើងអ្នកតាក៏ជាទំនៀមទម្លាប់ប្រពៃណីមួយក្នុងចំណោមបេតិកភណ្ឌអរូបីយជាច្រើនប្រណិបត្តិដោយអ្នកស្រុកអង្គរ។
គួរបញ្ជាក់ថារៀងរាល់ថ្ងៃ១កើតខែមាឃប្រជាជនតែងតែរកត្រីរួមគ្នាដើម្បីយកត្រីមកធ្វើម្ហូបនិងធ្វើចង្ហាន់ប្រគេនព្រះសង្ឃសម្រាប់ថ្ងៃ៣កើត ខែមាឃ ដែលជាថ្ងៃឡើងមាឃ ឬឡើងអ្នកតា៕ខេងរ៉ា