ខេត្តព្រះវិហារៈកាលពីព្រឹកថ្ងៃទី១១ខែធ្នូឆ្នាំ២០២០រដ្ឋបាលសាលាក្រុងព្រះវិហារដឹកនាំដោយលោក ប៉ុក ងួន អភិបាលក្រុង និងក្រុមការងារសហការជាមួយមន្ទីរសុខាភិបាលខេត្ត និងមន្ទីរទេសចរណ៍ខេត្ត ព្រមទាំងមានការចូលរួមពីមន្ត្រីប៉ុស្តិ៍រដ្ឋបាលកំពង់ប្រណាក,និងមន្ត្រីស.ស.យ.ក។ក្រុងបានចុះផ្សព្វផ្សាយសេចក្ដីណែនាំវិធានការការពារការចម្លងវិរុសកូវីដ១៩ចំពោះម្ចាស់រថយន្តនិងអ្នកដំណើរដែលស្ថិតនៅទីតាំងមួយចំនួននៅក្នុងក្រុង/ខេត្តព្រះវិហារ។
ទីតាំងដែលក្រុមការងារបានចុះធ្វើការផ្សព្វផ្សាយក្នុងពេលនោះរួមមាន ទីតាំងចំណតរថយន្តក្រុង ,បេនឡានផ្សារកំពង់ប្រណាក,និងអាគារសង្កាត់កំពង់ប្រណាក។មានប្រសាសន៍ក្នុងឱកាសចុះផ្សព្វផ្សាយនាពេលនោះលោកប៉ុកងួនអភិបាលក្រុងបានណែនាំប្រជាពលរដ្ឋទាំងអស់ដែលត្រូវធ្វើដំណើរពីគ្រប់ភូមិសាស្ត្រក្នុងខេត្តព្រះវិហារឆ្ពោះទៅនិងត្រឡប់មកពីរាជធានីភ្នំពេញក៏ដូចជាទៅមកខេត្តផ្សេងៗទៀត។ពលរដ្ឋត្រូវអនុវត្តន៍ឱ្យបានខ្ជាប់ខ្ជួនទៅតាមគោលការណ៍ណែនាំនិងវិធានការការពារការរាត្បាតជំងឺកូវីដ១៩ ជាពិសេសការទប់ស្កាត់ព្រឹត្តិការណ៍សហគមន៍២៨វិច្ឆិកា។
ចំពោះវិធានការដែលបានចុះផ្សព្វផ្សាយនាពេលនោះមានដូចជាត្រូវបើកបង្អួចរថយន្តឱ្យខ្យល់ចេញចូលដោយមិនប្រើម៉ាស៊ីនត្រជាក់។អ្នកដំណើរនិងអ្នកបើកបរទាំងអស់ត្រូវពាក់ម៉ាស់ដើម្បីជៀសវាងការចម្លងជាយថាហេតុនៃជំងឺផ្សេងៗរូមទាំងជំងឺកូវីដ១៩។ ត្រូវសម្អាតរថយន្តជាប្រចាំដោយប្រើទឹកសាប៊ូ និងជូតអាកុលតាមធ្នាក់កៅអី។ ម្ចាស់រថយន្តត្រូវវាស់កម្ដៅ ត្រូវមានទឹកអាកុលឬជែលអាកុល ឱ្យអ្នកដំណើរលាងដៃពេលឡើងលើរថយន្ត។
ចំពោះអ្នកបើកបររថយន្តទាំងអស់បើមានរោគសញ្ញាផ្ដាសាយដូចជាក្ដៅខ្លួន ឈឺបំពង់ករ ហៀសំបោរ ឬពិបាកដកដង្ហើមត្រូវផ្អាកការបើកបរជាបណ្ដោះអាសន្នរួចអញ្ជើញទៅមន្ទីរពេទ្យសាធារណៈដើម្បីត្រួតពិនិត្យសុខភាព៕វ៉ាន់ឌី
