ព័ត៌មានអន្តរជាតិ៖ទីភ្នាក់ងារចិនស៊ិនហួរកាលពីព្រឹកថ្ងៃទី១៤ខែកុម្ភៈបានឱ្យដឹងថាក្រសួងការពារជាតិមីយ៉ាន់ម៉ាបានឱ្យដឹងថាសិស្សសាលានៅខេត្តរ៉ាឃីនចំនួន២០នាក់បានរងរបួសធ្ងន់និងស្រាលក្នុងហេតុការណ៍បាញ់គ្រាប់ផ្លោងមួយពីសំណាក់សមាជិកនៃក្រុមប្រដាប់អាវុធអារ៉ាខាន់(ArakanArmy)ដែលត្រូវបានគេស្គាល់ថា ជាក្រុមបះបោរមួយក្នុងតំបន់។
សូមបញ្ជាក់ផងដែរថាហេតុការណ៍វាយប្រហារខាងលើនេះបានកើតឡើងនៅពេលដែលសមាជិកក្រុមឧទ្ទាមអារ៉ាខាន់បានបើកការវាយប្រហារមកលើយោធាមីយ៉ាន់ម៉ាមួយកងក្នុងកំឡុងពេលពួកគេកំពុងបើកប្រតិបត្តិការការពារសន្តិសុខមួយនៅស្រុកប៊ូធីដង(Buthidaung)កាលពីថ្ងៃព្រហស្បតិ៍។
ភ្លាមៗនោះកម្លាំងសន្តិសុខ ក៏បើកប្រតិបត្តិការតបវិញ ដោយបានបង្ខំឱ្យក្រុមឧទ្ទាមនោះដកថយ ហើយក្នុងអំឡុងពេលនៃការដកថយរបស់ពួកគេនោះហើយដែលពួកគេបានបាញ់គ្រាប់ផ្លោងជាច្រើនគ្រាប់។ក្នុងនោះមួយគ្រាប់បានធ្លាក់ចំលើសាលាបឋមសិក្សាមួយកន្លែងនិងបង្កឱ្យសិស្សសាលាជាច្រើននាក់រងរបួស ខណៈដែលពួកគេកំពុងរត់លេងនៅក្នុងទីធ្លាសាលា។
សិស្ស៥នាក់ដែលរបួសធ្ងន់ក្នុងចំណោមសិស្សរងរបួសទាំងអស់២០នាក់ត្រូវបានបញ្ជូនទៅព្យាបាលបន្ទាន់នៅមន្ទីរពេទ្យមួយកន្លែងនៅក្បែរៗនោះ។ខណៈអ្នករបួសផ្សេងទៀតត្រូវបានដាក់ឱ្យព្យាបាលនៅគ្លីនិកក្នុងជំរុំយោធា។
គួរជម្រាបថាអារ៉ាខាន់គឺជាក្រុមឧទ្ទាមប្រដាប់អាវុធមួយនៅមីយ៉ាន់ម៉ាដែលប្រយុទ្ធដើម្បីសិទ្ធិរបស់ជនជាតិភាគតិចរ៉ូហ៊ីងយ៉ាង។ក្រុមនេះតែងតែប៉ះទង្គិចជាមួយយោធាមីយ៉ាន់ម៉ាជារឿយៗខណៈរដ្ឋាភិបាលមីយ៉ាន់ម៉ាបានកំណត់ទុករួចមកហើយថា អារ៉ាខាន់ជាក្រុមភេរវកម្ម៕Sky news