បាត់ដំបង៖មានការភ្ញាក់ផ្អើលដោយមានសំឡេងផ្ទុះកក្រើកដីនៅចំណុចអូរជ្រៅស្ថិតក្នុងភូមិថ្ថ្មីឃុំតាតោកស្រុកសំឡូតខេត្តបាត់ដំបងដោយមានក្មេង១ក្រុមរើសបានគ្រាប់បេ៤០មួយគ្រាប់ហើយយកទៅដំលេងបណ្តាលឱ្យផ្ទុះស្លាប់ម្នាក់របួសបីនាក់កាលពីព្រឹកថ្ងៃទី៥ខែឧសភាឆ្នាំ២០២០។
លោកវរសេនីយ៍ឯកកោស៊ុនកាំងអធិអធិការនគរបាលស្រុកសំឡូតបានឱ្យដឹងថាយុវជនរងគ្រោះដល់ស្លាប់មានឈ្មោះលុចលីណេភេទប្រុសអាយុ១៥ឆ្នាំ។ចំណែកអ្នករបួសធ្ងន់ស្រាលបីនាក់មាន៖ឈ្មោះស្រីពេជ្រ ភេទ ស្រី អាយុ ១៦ ឆ្នាំរបួស ធ្ងន់លើផ្ទៃមុខ។ឈ្មោះពិន ដាវុធភេទប្រុសអាយុ ២៥ឆ្នាំរបួសធ្ងន់ដាច់ដៃស្តាំត្រឹម កែងដៃនិងឈ្មោះ នីប៊ុនណាតភេទប្រុសអាយុ១៤ឆ្នាំរបួសស្រាលដាច់ចុងច្រមុះ បន្តិច។ទាំងបួននាក់រស់នៅស្រុកភ្នំក្រវាញខេត្តពោធិសាត់ ។
លោកអធិការស្រុកបានបន្តថានៅព្រឹកកើតហេតុមានប្រជាពលរដ្ឋមួយក្រុមដែលមានលំនៅស្ថានស្ថិតនៅស្រុកភ្នំក្រវាញខេត្តពោធិសាត់បានធ្វើដំណើរចូលក្នុងព្រៃចំណុចភូមិសាស្ត្រខាងលើដើម្បីរកដកផ្សិត ប៉ក់ទៅលក់ចិញ្ចឹមជីវិត។ពេលនោះយុវជនម្នាក់ឈ្មោះ លុច លីណេ ភេទប្រុស អាយុ ១៥ឆ្នាំ ប្រទះឃើញគ្រាប់ កាំភ្លើងប្រភេទB40មួយគ្រាប់ដែលជា យុទ្ធភ័ណ្ឌមិនទាន់ផ្ទុះសេសសល់ពីសម័ យសង្គ្រាម។
យុវជនក៏បានយកគ្រាប់នេះទៅដំលេងនៅលើគល់ឈើនៅក្បែរនោះបណ្តាលឱ្យផ្ទុះឡើងកក្រើកដីបណ្តាលឱ្យស្លាប់យុវជនអ្នកដំគ្រាប់នោះភ្លាមៗនៅកន្លែង។រីឯអ្នកនៅក្បែរនោះចំនួន៣នាក់ផ្សេងទៀតបានរងរបួសធ្ងន់ពីរនាក់និងស្រាលម្នាក់។
លោកអធិការស្រុកបានបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យខេត្ត។ចំណែកសាកសពប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី។ដោយឡែកលោកវរសេនីយ៍ឯកអ៊ុកសារិនមេបញ្ជាការវរសេនាតូចនគរបាលការពារព្រំដែនគោកលេខ៣១០បានឱ្យដឹងថាទីកន្លែងដែលមានករណីផ្ទុះគ្រាប់ខាងលើនេះស្ថិតនៅចម្ងាយប្រមាណ៨គីឡូម៉ែត្រពីប៉ុស្តិ៍នគរបាលព្រំដែនពាមតាចំណុះវរសេនាតូចលេខ៣១០។
លោកបានបន្តថាយុទ្ធភ័ណ្ឌមិនទាន់ផ្ទុះមាននៅរាយប៉ាយច្រើនទាំងនៅលើដីនិងបង្កប់ក្នុងជម្រៅដីហើយយូរៗម្តងករណីគ្រោះថ្នាក់ដោយយុទ្ធភ័ណ្ឌនេះបានបង្កឱ្យមានមហន្តរាយដល់អាយុជិវិតមនុស្សឬពិការភាពផងដែរ៕
រូប៖ សហការី
