ភ្នំពេញ៖ឧត្តមក្រុមប្រឹក្សានៃអង្គចៅក្រមបានពិនិត្យនិងសម្រេចអំពីការតែងតាំងប្រធានសាលាឧទ្ធរណ៍តំបន់ការផ្ទេរនិងតែងតាំងប្រធានអនុប្រធានចៅក្រមសាលាដំបូងរាជធានីខេត្តមួយចំនួន។ការពិនិត្យសំណើតែងតាំងអគ្គព្រះរាជអាជ្ញានៃមហាអយ្យការអមសាលាឧទ្ធរណ៍តំបន់ការផ្ទែរនិងតែងតាំងព្រះរាជអាជ្ញាព្រះរាជអាជ្ញារងនៃអយ្យការអមសាលាដំបូងរាជធានីខេត្តមួយចំនួនតាមសំណើរបស់រដ្ឋមន្ត្រីក្រសួងយុត្តិធម៌។
ការពិនិត្យសម្រេចនេះបានធ្វើឡើងនៅក្នុងសម័យប្រជុំលើកទី៣៣របស់ឧត្តមក្រុមប្រឹក្សានៃអង្គចៅក្រម ក្រោមព្រះរាជាធិបតីដ៏ខ្ពង់ព្រះករុណាព្រះបាទសម្តេចព្រះបរមនាថ នរោត្តមសីហមុនីព្រះមហាក្សត្រ នៃព្រះរាជាណាចក្រកម្ពុជា ព្រះប្រធានឧត្តមក្រុមប្រឹក្សា នៃអង្គចៅក្រម កាលពីថ្ងៃទី១៧ ខែកក្កដា ឆ្នាំ២០២០ នៅព្រះបរមរាជវាំង។
យោងតាមសេចក្តីប្រកាសព័ត៌មានរបស់អគ្គលេខាធិការដ្ឋានឧត្តមក្រុមប្រឹក្សានៃអង្គចៅក្រមបានឱ្យដឹងថា៖លទ្ធផលនៃកិច្ចប្រជុំឧត្តមក្រុមប្រឹក្សានៃអង្គចៅក្រមមានដូចតទៅ។របៀបវារៈទី១៖ពិនិត្យនិងសម្រេចអំពីការតែងតាំងប្រធានសាលាឧទ្ធរណ៍តំបន់ការផ្ទេរនិងតែងតាំងប្រធានអនុប្រធានចៅក្រមសាលាដំបូងរាជធានី-ខេត្តមួយចំនួន។
អង្គប្រជុំបានសម្រេចយល់ព្រមលើការស្នើតែងតាំងប្រធានសាលាឧទ្ធរណ៍ព្រះសីហនុ ចៅក្រមសាលាឧទ្ធរណ៍ព្រះសីហនុ ១រូប និងប្រធានសាលាដំបូងខេត្តចំនួន៣រូប។ របៀបវារៈទី២៖ពិគ្រោះយោបល់លើសំណើតែងតាំងអគ្គព្រះរាជអាជ្ញានៃមហាអយ្យការអមសាលាឧទ្ធរណ៍តំបន់ ការផ្ទេរ ។
តែងតាំង ព្រះរាជអាជ្ញាព្រះរាជអាជ្ញារងនៃអយ្យការអមសាលាដំបូងរាជធានី-ខេត្ត មួយចំនួនតាមសំណើរបស់រដ្ឋមន្ត្រីក្រសួងយុត្តិធម៌៖អង្គប្រជុំបានផ្តល់យោបល់យល់ព្រមលើសំណើតែងតាំងអគ្គព្រះរាជអាជ្ញានៃមហាអយ្យការអមសាលាឧទ្ធរណ៍បាត់ដំបងការផ្ទេរនិងតែងតាំងព្រះរាជអាជ្ញានៃអយ្យការអមសាលាដំបូងរាជ ធានី-ខេត្ត សរុបចំនួន៦រូប ។
របៀបវារៈទី៣ ៖ពិនិត្យ និងសម្រេចលើសំណើសុំអនុញ្ញាតច្បាប់ទៅបន្តការសិក្សារបស់ចៅក្រម១រូប នៃសាលាដំបូងខេត្តកណ្តាល ៖ អង្គប្រជុំបានសម្រេចអនុញ្ញាតច្បាប់ឱ្យលោកស្រី អ៊ី ម៉ាណូកា ចៅក្រមសាលាដំបូងខេត្តកណ្តាលឈប់សម្រាករយៈពេល២ឆ្នាំចាប់ពីថ្ងៃទី៣ខែសីហាឆ្នាំ២០២០ដល់ថ្ងៃទី៣ខែសីហាឆ្នាំ២០២២។ដោយរក្សាក្របខណ្ឌនិងគ្មានប្រាក់បៀវត្សដើម្បីឱ្យសាមីខ្លួនបានទៅបន្តការសិក្សា។
របៀបវារៈទី៤៖ពិនិត្យនិងសម្រេចលើសំណើសុំតាំងស៊ប់ក្នុងក្របខណ្ឌចៅក្រមចំពោះចៅក្រមកម្មសិក្សាចំនួន៣៩រូប៖អង្គប្រជុំបានសម្រេចយល់ព្រមលើសំណើសុំតាំងស៊ប់ក្នុងក្របខណ្ឌចៅក្រមចំពោះចៅក្រមកម្មសិក្សាចំនួន៣៩រូបដែលបានបញ្ចប់កម្មសិក្សារយៈពេល១ឆ្នាំនិងចាត់ឱ្យទៅបំពេញការងារនៅតាមសាលាដំបូងរាជធានី-ខេត្ត ។
របៀបវារៈទី៥៖ពិគ្រោះយោបល់លើសំណើសុំតាំងស៊ប់ក្នុងក្របខណ្ឌព្រះរាជអាជ្ញាចំពោះព្រះរាជអាជ្ញារងរបស់កម្មសិក្សាចំនួន១៥រូបតាមសំណើរបស់រដ្ឋមន្ត្រីក្រសួងយុត្តិធម៌៖អង្គប្រជុំបានផ្តល់យោបល់យល់ព្រ លើសំណើសុំតាំងសប៊ប់ក្នុងក្របខណ្ឌព្រះរាជអាជ្ញា ចំពោះព្រះរាជអាជ្ញារងកម្មសិក្សាចំនួន ១៥រូប ដែលបានបញ្ចប់កម្មសិក្សា និងចាត់ឱ្យទៅបំពេញការងារនៅតាមអយ្យការអមសាលាដំបូងខេត្ត ។
របៀបវារៈទី៦៖ពិនិត្យនិងសម្រេចអំពីការកំណត់ងារសម្រាប់ចៅក្រមនិងព្រះរាជអាជ្ញាតាមមុខតំណែង ៖អង្គប្រជុំបានសម្រេចយល់ព្រមលើសេចក្តីព្រាងព្រះរាជក្រឹត្យ ស្តីពីការកំណត់ងារសម្រាប់ចៅក្រម និងព្រះរាជអាជ្ញាតាមមុខតំណែង។របៀបវារៈទី៧៖បញ្ហាផ្សេងៗ៖អង្គប្រជុំមិនមានបញ្ហាអ្វីដែលត្រូវលើកឡើងទេ ។
ជាទីបញ្ចប់នៃកិច្ចប្រជុំ ព្រះករុណាជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា ព្រះប្រធានឧត្តមក្រុមប្រឹក្សានៃអង្គចៅក្រមបានថ្លែងអំណរគុណដ៏ជ្រាលជ្រៅចំពោះការខិតខំយកចិត្តទុកដាក់បំពេញបំពេញការងាររបស់សមាជិកឧត្តមក្រុមប្រឹក្សានៃអង្គចៅក្រម។ព្រះព្រះអង្គបានប្រកាសបិទសម័យប្រជុំលើកទី៣៣របស់ឧត្តមក្រុមប្រឹក្សានៃអង្គចៅក្រមប្រកបដោយជោគជ័យនិងបរិយាកាសល្អប្រសើរ៕សុភាព
